هيّض ابن حصيص في تالي نهاره #### ألف قاف ٍ في ضميره مدلجاتي
يـــاوجــودي وجـد مكسور الجباره #### آخــذ ٍ تـسـعين لـيلـه مايـبـاتي
أو وجـود اللي خـذا الحـاكـم ديــاره #### خـذ حـلاله والـحريم مسـلـّباتي
عــقـب ماهــو تـاجـر وراعـي أماره #### صـار فلاح ٍ وامـوره هـيناتـي
أرتــــحــل يـا فــهيد منبوز الفقاره #### آركي وحبــال كوره كالفاتي
آركي ومــربـــّع ٍ عـــشب القــــراره #### ما علاه الشد من عشر سنواتي
ديرة الوشم ما فيها صقاره #### غير شيبان وعجز محندباتي
من خشوم اكميت إلى حد الزباره #### جعل تمحل والوشوم مربعاتي
صاحبي بالوقف مدهاله وداره #### ما سكن في ثرمدا والاّ مراتي
ولعتني بالهوى والحب ساره #### دلهتني عن غنادير البناتي
يا حسايف بنت ذاك الجار ساره #### عند ابوها تدّرج مثل المهاتي
ريق ساره مثل شكر في غضاره #### أو حليب ابكار عرب مسمناتي
والنهيد زبيدي ٍ في دعب قاره #### في محير الماء القراح مصلّعاتي
والثنايا قحــــويان في زباره #### زاهي نبــــته على كل النــــــباتي
راس ساره ذيل شقراً وسط غاره #### والجدايل بالرشوش مجدلاتي
والمطوع لو يشوف خديد ساره #### طبّق المصحف وعجّل بالصلاتي
ما ذكر جار ٍ ذبح بالحب جاره #### بالمبيسم والثنايا المرهفاتي
حالف ٍ بالله ما نسى حب ساره #### الا ان اهل شقرا يخلون الصلاتي
لايمي فاله حنيش ٍ في مغاره #### سمّها يشظى العظام الصالباتي